Standard & Poor’s – Global Rating

É poc, kes instituisões ke tem txeu influênsia na desisões de investimente e d’polítika ekonómika moda agênsias de notasão driske. Na meio des, tem S&P Global Ratings (Standard & Poor’s) ke ta destaka pe sé história, dimensão e impakte.

Fundod na 1860, a partir de publikasões de Henry Varnum Poor (ke tava ta xpiá manera de organizá dados sobre empresas ferroviárias na Estados Unidos) S&P kriá e transformá, durante más de um sékulo e meio, num referênsia inkontornável na avaliasão de riske de krédito de Estados soberanos, empresas e instrumentes finanseires.

Missão deklarod de S&P é de fornesé avaliasões independentes de kapasidade e disposisão de emissores de dívda na honrá sés kompromis finanser, o ke kriá um linguagem komum ke investidores de mund inter podé utilizá pa komparé riske. Es avaliasões é xposte em eskalas alfabétikas de “AAA” (xselente solvabilidade) a “D” (inkumprimente) e ta influensiá, diretamente, taxas de juro ke países e empresas ta pagá pa finansiá és mes.

No entant, krítikos ta mostrá ke existênsia de apenas uns pok instituisões ke peso global ta kriá um ambiente onde ke dsisões independentes podé gerá efeitos sistémikos enormes. Es krítikas, frequentemente dirigide pa kel xamado “modelo de emissão paga pelo avaliado”, ta levantá questões sobre possíveis konflites de interesse e real indpendênsia des avaliasões.

Na plone global, más dós grandes agênsias de rating mundialmente rekonhesid, Moody’s Investors Service e Fitch Ratings ta kompô, má S&P, o kes ta txmá de “Big Three” de rating internasional. Es três instituisões tá dominá kobertura na pratikamente tud merkados importantes, desde Estados Unidos e Europa até países em dsenvolvimente na África e América Latina. Além des, tem otes agênsias ké rekonhesid pa regiões, moda DBRS Morningstar e Scope Ratings, ke també ta kontribui pa diversidade de perspetivas na merkado de krédito.

Nes kontexte, resente evolusão d Cabo Verde pe S&P tá mereé partikular atensão. Es agênsia elevé klassifikasão soberana de país de B pa B+ (fevereiro 2026), o ke manté um perspetiva positive. Dsisão foi justifikod pe fortalesimente de indikadores fiskais e xternos, impulsionod pe turismo, pe remessas e pe konsolidasão de dívda públika, fatores ke, sgunde S&P, ta reduzi fragilidade e ta abri xpase pa um kressimente más sustentável.

Num país piknin e aberte moda Cabo Verde, ke finansas ta dpendé txeu de fluxos xternos, um nota más olte podé reduzi kustos de finansiamente, atrai investidores xtranger e aumentá kredibilidade internasional de arkipélago.

No entant, ka podé ser ignorod ke um klassifikasão moda “B+” ta kontinuá ta txá Cabo Verde na zona de riske xpekulative, dboxe de kel txmod grau de investimente. Is ta signifika ke, embora tem tid progresse, ainda tem dsafios moda dpendênsia de turismo europeu, limitasões na infraxtruturas e vulnerabilidades xternas ke podé influensiá avaliasões fturas.

Resumidamente, Standard & Poor’s e kés ote agênsias globais de rating ta funsioná moda uns barómetros de konfiansa internasional. Pa Cabo Verde, suses ka ta somente na sbi es degraus na xkala alfabétika. Verdader dsafio de melhorá na rating ta na garanti ke evolusão positive ta traduzi num dsenvolvimente sustentável, inklusive e resiliente, kapaz de bá além de klassifikasões e respondé nesessidades reais de país.