Artigo de Opinião: Kes traboi (im)possíveis de António Guterres

António Guterres foi Primer-Ministro de Portugal de 1995 a 2002 e Sekretário-Geral de Partide Sosialista de 1992 a 2002, e na ONU el assumi funsão de Sekretário-Geral desde dia 1 de janeiro de 2017, sendo kel nona psoa a okupá es kargo. António Guterres, nassé na Lisboa dia 30 de abril de 1949 e sés gente era de Aldeia das Donas, konselho de Fundão.

Komo Secretário-Geral de ONU António Guterres lansá um novo e urgente pedido de paz, onde ke el apresentá ses prioridades pa 2024 na Assembleia Geral, num kontexto de txeu kaos na mundo, onde ke el afirmá ke akontesimentos na Gaza ta bem txa “um frida infetod” na konssiênsia koletiva e ta amesá região de Oriente Médio inter.

Guterres dzé ke destruísão e morte na Gaza tem acontesid num eskala e velosidade sem igual desde ke el assumi lideransa de Nasões Unidas, na 2017. El ta lamentá ke Konselho de Seguransa de ONU ka tem konseguido respondé adekuadamente a es Konflito entre Israel e Hamas na Gaza e a kel invasão de Rússia na Ucrânia. Guterres tem exigide sistematikamente um “sessar-fogo humanitário imediato” na Faixa de Gaza e libertasão de tud reféns de Hamas.

Komo líder de ONU el tem destakod nesessidade urgente de reformas na Konselho de Seguransa e na Sistema Finanseiro Internasional. Sekretário-Geral ta otxá ke ess “raxa geopolítiko” tem blokeod  Konselho de Seguransa. Ess situasão atual ta vra kada vez mais grave e mais perigose ke um diskurso de ódio, diskriminasão e extremismo na komunidades o ke tem txod trabalhos de paz kase impossíveis.

António Guterres tem sido um voz konstante a favor de reforma na konselho de Seguransa. El ta defendé inklusão de países emergentes moda Índia, África do Sul e Brasil pa juntá má kes sinko membros permanentes.

Guterres identifiká um klima de antissemitismo, fanatismo anti-musulmano, perseguisão de komunidades kristãs minoritárias e otros formas de deskriminasão e rasismo. Es klima de intolerânsia, tem sido potencializod pa revolusão digital ke por kausa de se  imaturidade ta permiti usos agressivos des kapasidade.

Apesar de esforso de Nações Unidas na investimentos de karácter sosial e de defesa de direitos individuais, ne sufisiente pa combaté informasão tóxika e manipulasão de konteúdos. Além dis, Guterres tem defendido  publikasão de um kódigo de konduta pa integridade de informasão de maneira a ajudá desisores a vrá espaso digital mais inklusivo e mais seguro pa tud gent.

Em relasão a krise klimátika, António Guterres agênsias espesializadas de ONU alertá ke era de kombustíveis fósseis tá na fim, onde ke é inevitável  transisão energétika. Guterres dzé ke nesessário agi imediatamente pa garanti ke prosesso ta ser justo pa psoas e pa  planeta, além de rápido o sufisiente pa evita um katástrofe klimátika total.

Traboi de António Guterres é difísil.El  um polítiko de klasse mundial txeu xperiente e ke padrões morais olt ke ta pol ta negosiá ma tud interlokutores, independentemente de regime polítiko de kada um.

Na nova ordem mundial é ti ta dsenhá, xei de insertezas e kontradisões, Secretário Geral de ONU e se equipa, ta “kondenod” a insisti na diálogo, na komunikasão konstrutiva pa ganhá dias de paz e kompromissos de desenvolvimente ekonómiko e sosial ke ta valorizá ameasa klimátika.