Artigo de Opinião: Ka ta existi apartheid?

Apartheid é um palavra ke kré dzé “separasão”, ou “estado de ser separod” e se primer uso foi na 1929.

É um termo ke ganhá relevânsia histórika na anos 60, na África do Sul, onde ke regime polítiko tava apliká um segregasão rasial brutal na populasão não-branka. Quand kes prosessos de deskolonizasão na África bá ta dá fim, regime sul-afrikane fká isolod internasionalment e na dékada 90 el kei e Nelson Mandela, líder de Congresso Nasional Africano, vrá Presidente de um Africa do Sul nov.

Segregasão rasial komo forma de domínio polítiko de um rasa ou de um grup sosial ka foi exklusiv de história de África do Sul. Nes últimos milénios eskravatura e alguns forma de eskravatura, era um manera de segregasão sistematizod (exmple: de Egipto antig a Grécia klássika).

Kontinente americano, txeu diverso, apresentá ao por sékulos formas de eskravatura e segregasão diferente na tud sé território. Antes de segregasão ke bem de kolonizasão osidental, já tinha um passod fort de prátikas de segregasão sistematizod a partir de konseitos/visões de tribo e povo.

Kolonizasão osidental okupá espaso de domínio polítiko de populasões indígenas e introduzi uns dinâmicas nove de explorasão e segregasão de karáter txeu rasial. Li o ta importá é dzé ke kes dois maiores estados amerikanos (Brasil e Estados Unidos da América), ke é independentes a mais de 200 anos. Nes período temporal ke polítikas de kombate a segregasão de intensidad e especificidad diferent, foi insuficient pa ke na nos dias ka existisse situasões de segregasão rasial.

Na anos 60 e 70, movimento síviko pa direitos humanos liderod pa Martin Luther King, ke txeu esforse e lágrimas, gerá  nesessidad inevitável de mudá polítika e sosialment Estados Unidos da América. Es prosessos é de gestasão lenta e ta akontese durant uns períodos temporais grande, ke ainda hoj es lutas ta kontinuá. De realsá ke es lutas ta po de mesmo lod de defesa de progress sosial txeu rasas, kulturas e até organismos polítikos.

Nes moment ke no ta passá, na txeu kontinentes ta akontesé situasões de segregasão sistematizod de trasos distintivos moda kor de pel, sexo, religião, klase sosial. Es prosess é polítika assumid de uns estados ke visibilidade internasional, embora es ta justifikas ke enquadrament históriko e kultural.

Guerra de Israel na Palestina é um genosídio pa sistemátika destruisão de vida e de kondisões nesessárias pa sobrevivênsia humana. ONU e ses diversos órgãos, de um manera inkansável, tem buskod solusões pa travá es tragédia humanitária, akompanhod pa txeu estados, de tud kontinentes ke diferentes regimes polítikos.

Moda no dzé na inísio, Apartheid é um domínio polítiko sistematizod de um grup sobre ot grup de forma desumane. Konvensão Internasional sobre Supressão e Punição do Crime de Apartheid, de 1973, defini Apartheid kome:

– intensão de manté dominasão de um grup sob ot;

– um context de opressão sistemátika;

– e perpetrasão de atos desumane.

Nes últimos anos, Israel foi akusod pa três agênsias de direitos humanos e pa ONU de violá  direit de palestinianos. Israel estabelesé um regime de apartheid ke ta dominá populasão palestiniana na sé todo.

Na 2024, situasão na Palestina fka mas grave e ka tem palavras pa deskrevé es tragédia.